ఎయిరిండియాలో క్లీనింగ్ కార్మికుడు.. కానీ తన మాటలతో ఇంటర్నెట్‌ హీరో అయ్యాడు!

ఎయిరిండియాలో క్లీనింగ్ సిబ్బందిగా పనిచేస్తున్న ఒక సామాన్య ఉద్యోగి తన వృత్తి పట్ల ప్రదర్శించిన అంకితభావం, నిబద్ధత ప్రస్తుతం నెటిజన్ల మనసు గెలుచుకుంటోంది. అతడితో జరిపిన ఒక చిన్న సంభాషణకు సంబంధించిన వీడియో సామాజిక మాధ్యమాల్లో వైరల్‌గా మారడంతో, తెర వెనుక శ్రమించే ఇలాంటి ఎందరో సామాన్య ఉద్యోగుల స్ఫూర్తిదాయక కథనాలు మరోసారి వెలుగులోకి వచ్చాయి.

వివరాల్లోకి వెళితే, వర్ష అనే ఇన్‏స్టాగ్రామ్ యూజర్ తన ప్రయాణ సమయంలో ఎయిరిండియా క్లీనింగ్ సిబ్బందిలో ఒకరిని కలిశారు. ఆమె అతనితో మాటలు కలుపగా, "ఎయిరిండియాలో చేరాలన్నదే నా జీవితాశయం" అని అతడు ఎంతో గర్వంగా, ఉత్సాహంగా సమాధానమిచ్చాడు. అంతేకాదు, "ఏదీ సులభంగా రాదు.. కానీ ఏదైనా సాధ్యమే" అంటూ తన జీవిత దృక్పథాన్ని బలంగా వినిపించాడు. ఇందుకు సంబంధించిన దృశ్యాలను ఆమె వీడియో తీసి సామాజిక మాధ్యమాల్లో పంచుకున్నారు. తన సహోద్యోగులతో పాటు క్యాబిన్ సిబ్బంది పట్ల కూడా అతడు ఎంతో గౌరవం చూపించడం ఆ వీడియోలో స్పష్టంగా కనిపిస్తోంది. తన తోటి వారి పనితీరును కూడా ఆయన మనస్ఫూర్తిగా అభినందించారు.

ఈ వీడియోను చూసిన నెటిజన్లు ఆ ఉద్యోగి నిరాడంబరతకు, ఆయనలోని సానుకూల దృక్పథానికి ముగ్ధులవుతున్నారు. "సార్, మీరు ఆప్యాయమైన ఆలింగనానికి అర్హులు", "పుస్తకం అట్టను చూసి లోపలి సారాన్ని అంచనా వేయకూడదు" అంటూ ప్రశంసలు కురిపిస్తున్నారు. ఏ వృత్తిలోనైనా గౌరవం, ఒక ఆశయం ఉంటాయని ఈ ఘటన మరోసారి గుర్తుచేస్తోందని పలువురు అభిప్రాయపడుతున్నారు.

"యాదృచ్ఛికంగా నేను ఒక క్లీనింగ్ సిబ్బందిని కలిశాను. అతని మాటల్లో అపారమైన ఆత్మవిశ్వాసం కనిపించింది. ఎయిరిండియాలో పనిచేయడం తన కల అని చెప్పడమే కాకుండా, తన సహోద్యోగుల గురించి కూడా ఎంతో గొప్పగా మాట్లాడారు. ఆయన చాలా స్వచ్ఛమైన మనసున్న వ్యక్తి. ఇటువంటి వ్యక్తిని కలిసినందుకు ఎంతో సంతోషంగా ఉంది. ఆయన మనందరికీ స్ఫూర్తిప్రదాత" అని వర్ష పేర్కొన్నారు.

"మన జీవిత పరమార్థం సంతోషంగా ఉండటమే. మనం కలలు కన్న జీవితాన్ని గడపడమే అతిపెద్ద సాహసం" అని ఆ ఉద్యోగి తనతో అన్నట్లు వర్ష తన పోస్ట్‌లో వెల్లడించారు. ప్రస్తుతం ఈ వీడియో నెట్టింట వైరల్‌గా మారింది.